De Immanitate Liber

PRAEFATIO

Ioannis Ioviani Pontani opusculi, quod est De immanitate, duo exemplaria manu scripta, quo,d quidem sciam, ad aetatem nostram pervenerunt, quae uno eodemque codice chartaceo 2840 continentur, qui Romae in Bibliotheca Apostolica Vaticana adservatur: horum unum (ff. 32-55) autographum est, alterum (ff. 10-24) apographon.

Autographum (= A), quod non est dubium quin totum sua manu Pontanus exaraverit, charta quaedam tuetur, cuius in margine superiore Petrus Summontius manu sua haec adnotavit (f. 32 r): «De Jmmanitate Archetypum Pontani / ipsius manu scriptum & emendatum»; praeterea f. 33 r, cuius in tergo autographum incipit, hanc animadversionem praefert a nescio quo in summa pagina exaratam: «De Jmmanitate, charte 24 de mano del potano». Tot enim chartas Pontani manu scriptas autographum complectitur (ff. 33 v- 55 r).